இயக்குநர் சரஜ் சிவன் இயக்கத்தில் நடிகர்கள் குரு சோமசுந்தரம், அனு மோல், அர்ச்சனா, விஜய் விஸ்வா என பலர் நடித்துள்ள இந்தத் திரைப்படத்தை தண்டர் மீடியா மற்றும் எல் வி என்டர்டெயின்மென்ட் தயாரித்துள்ளனர்.
சரி வாங்க விமர்சனத்தை பார்ப்போம்:
நேர்மையான மருத்துவராக நடித்திருக்கிறார் குரு சோமசுந்தரம். அவருடைய மனைவியாக அனு மோலும், மகளாக அர்ச்சனாவும், அவரது காதலனாக விஜய் விஷ்வாவும் நடித்துள்ளனர். தனக்கு வெளிநாட்டில் வேலை கிடைத்த செய்தியை தன்னுடைய பெற்றோர்களான குரு சோமசுந்தரம் மற்றும் அனு மோலிடம் தெரிவிக்க ஆசைப்பட்டு அழைக்கிறார் அர்ச்சனா. அவ்வாறு அழைக்கும் போது தன்னுடைய பெற்றோர் இருவரும் மனக்கசப்பு காரணமாக தனித்தனியே இருப்பதை அறிகிறார். இதனால் வருத்தப்பட்டு தன்னுடைய பெற்றோரை சேர்த்து வைப்பதற்காக சென்னை வருகிறார் அர்ச்சனா. குரு சோமசுந்தரமும் அனு மோலும் எதற்காக பிரிந்து வாழ்கின்றனர்? அதன் பின்னணி காரணம் என்ன? என்பதே கதை….
நேர்மையான மருத்துவராக நடித்துள்ள குரு சோமசுந்தரம் தனக்கே உரிய ஜனரஞ்சகமான நடிப்பைக் கொடுத்திருக்கிறார். வெப் சீரிஸில் நாம் ரசித்து கொண்டு இருந்த அனு மோல் தற்போது இந்த திரைப்படத்தில் முக்கிய கதாபாத்திரத்தை ஏற்று சிறப்பாக செய்திருக்கிறார். எந்த சிக்கல் வந்தாலும் எதிர்கொள்ளத் துணியும் அவரது நடவடிக்கை காட்சிகளில் சிறப்பாக வெளிப்பட்டு இருக்கிறது. குடும்பத்திற்காக பிரச்சனை யிலிருந்து ஒதுங்குவதும், அதே குடும்பத்திற்காக மீண்டும் அந்தப் பிரச்சினையை எதிர்கொள்வதுமாக குரு சோமசுந்தரம் சிறப்பாக நடித்திருக்கிறார்.
இவர்களுடன் அர்ச்சனா, விஜய் விஷ்வா ஆகியோருடைய கதாபாத்திரங்களும் ஏமாற்றவில்லை. இவர்கள் மட்டுமல்லாது சாய் விக்கி, நயன் சாய், பிபின் என பலரும் தனக்கு கொடுத்த வேலையை மட்டும் செய்துள்ளனர் .
சதீஷ் ஜி-யின் ஒளிப்பதிவு இயல்பாக காட்சிகளை கொடுக்கிறது. கே-வின் இசையும், பின்னணி இசையும் பரவாயில்லை. அரசியல்வாதியை எதிர்க்கும் இடங்களிலும் அதிலிருந்து தன்னுடைய குடும்பத்தை மீட்கும் இடங்களிலும் எழுத்தில் கூடுதல் கவனம் வெளிப்பட்டு இருக்கிறது. அதே சமயம் இரண்டாம் பாதியில் சற்று தொய்வான காட்சி அமைப்புகள் ஒருவித சலிப்பை ஏற்படுத்துகின்றன. விறுவிறுப்பும் சுவாரசியமும் இன்றி நகரும் இரண்டாம் பாதி ஒரு வித அயற்சியைக் கொடுப்பதைத் தவிர்க்க முடியவில்லை. இவை தவிர தொழில்நுட்ப ரீதியாக சிறப்பாக அமைக்கப்பட்டிருக்கிறது பாரிஸ் கஃபே.
கதையை இன்னும் தெளிவாக சொல்லியிருக்கலாம்…. இசையில் கூடுதல் கவனம் தேவை…
மொத்தத்தில் இந்த பாரிஸ் கஃபே குடும்ப தகராறு…..
